YESU ANASEMA HAMNITAKI MIMI, LAKINI AKIJA MWINGINE MNAMTAKA!

YOHANA 5:37-47

“ ³⁷Naye Baba aliyenipeleka amenishuhudia. Sauti yake hamkuisikia wakati wowote, wala sura yake hamkuiona. ³⁸Wala Neno lake hamnalo likikaa ndani yenu, kwakua ninyi hammwamini yule aliyetumwa na Yeye. ³⁹Mwayachunguza maandiko, kwasababu mnadhani kwamba ninyi mna uzima wa milele ndani yake; na hayo ndiyo yanayonishuhudia. ⁴⁰Wala hamtaki kuja kwangu mpate kuwa na uzima. ⁴¹Mimi siupokei utukufu kwa wanadamu. ⁴²Walakini nimewajua ninyi ya kuwa hamna upendo wa MUNGU ndani yenu. ⁴³Mimi nimekuja kwa jina la BABA yangu, wala ninyi hamnipokei; mwingine akija kwa jina lake mwenyewe, mtampokea huyo. ⁴⁴Mwawezaje kuaamini ninyi mnaopeana utukufu ninyi kwa ninyi, na utukufu ule utako kwa MUNGU aliye wa pekee hamuutafuti? ⁴⁵Msidhani kwamba mimi nitawashtaki kwa BABA; yuko anayewashitaki, ndiye Musa, mnayemtumaini ninyi. ⁴⁶Kwa maana kama mngalimwamini Musa, mngeniamini mimi; kwa sababu yeye aliandika habari zngu. ⁴⁷Lakini msipoyaamini maandiko yake, mtayaamini wapi maneno yangu?”

BWANA YESU ASIFIWE watu wa mataifa yote. Karibuni katika neno hili ili kujifunza zaidi na kumwelewa YESU vizuri, ambaye ndiye BWANA na mwokozi wa ulimwengu wote na ni mfalme wa wafalme.

Napenda kila mtu yule anayempenda YESU aelewe na aangalie asije akampenda yule mwingine ambaye ndiye adui na kumtaka pasipo kujua au kwa kujua badala ya kumpenda YESU. Katika ulimwengu huu wa sasa yale yaliyosemwa na YESU sasa yanaonekana na mengine yanafuatwa na watu pasipo kujua na wengine kwa kujua. Amenituma niwaeleze kwa sababu yeye ni mwema kwako, anakupenda, ana wivu juu yako na hataki akukose katika ufalme wake. Anataka kama ukimkubali siku moja ufike mbinguni. Ila kama ukimkataa na yeye atakukataa, huu ndio wakati wako wa kupanda utakachovuna katika ile siku ya mwisho ya kutengwa ngano na pumba.

Yamkini wewe ni ngano basi usigeuke ukawa ni pumba na kama kwa sasa ni pumba basi ugeuke ukawe ngano. Je kwa msemo huu YESU anamaanisha nini akisema mimi hamnitaki, lakini akija mwingine huyo mtamtaka? Swali lingine hapa, je huyo mwingine ni nani? Anaitwa nani? Anatoka wapi? Yukoje? Hili ni fumbo. YESU alimaanisha kuwa huyo mwingine ni mtu atakaye litumia jina la YESU kwa kuchanganya na mapokeo ya wanadamu au kwa kuweka sheria zake ambazo sizo za YESU na wala si zile zilizoletwa na MUNGU, kwamba hizo mtazitaka ila zile alizozileta mwana wa pekee hamzitaki ambazo ni zenye ukweli na zenye uzima, bali zile zenye uongo na zisizo na uzima wa milele hizo mnazitaka, hii ni kuhakikisha baadhi hawamtaki YESU kwa kujua na wengine kwa kutojua wakati nia ya mioyo yao ni kumpenda YESU. Mpaka hapo mtakua mmeelewa kwa kiasi fulani.

Uthibitisho katika hayo utaupata kwa mambo aliyoyakataa YESU na yale ambayo yameletwa na huyo mwingine asiyejulikana au hajatokea mbinguni:

1.     Ubatizo wa maji mengi ya mtoni, ni wachache wanaukubali  (kumkubali YESU);

2.     Ubatizo wa kisima (kumkataa YESU na kumkubali huyo mwingine anayetumia jina la YESU).

3.     Ubatizo wa kupigwa na fagio, huo sio wa YESU, bali wapo wanao mkubali huyo mwingine huku wakitumia jina la YESU.

4.     YESU hakubatizwa kwenye maji ya kikombe na wala haijaandikwa watu wabatizwe hivyo, lakini Neno la YESU limetimia. Akisema mimi hamnitaki lakini huyo mwingine atakuja mtamtaka, mpaka hapo hakuna ubishi. Haijlishi unayachunguza maandiko kama vile unao uzima na kumbe kwa kumtamka huyu mwingine tu unakua unapoteza uzima wako wa milele. Hata ukisoma kitabu cha UFUNUO 22: 18-19, MUNGU ameonya.

5.     Imeandikwa watu waombewe bure bila kutozwa pesa, utaona hapa baadhi ya wahubiri wanataka vitu vya YESU na jina lake lakini hawataki Neno lake, wanataka neno la huyo mwingine la kuwatoza watu pesa za kuombea watu. Hata baadhi ya watumishi katika ulimwengu huu hawamtaki YESU wanamtaka huyo mwingine na hata kuwafanya mataifa kuingizwa katika ufalme wa shetani pasipo kujua au kwa kujua, ila baadhi yao ni wakala wa shetani kabisa na wanajua wanachokifanya, walichotumwa na boss wao shetani au amiri jeshi mkuu wao wa kuzimu. Kitu cha kujiuliza, je kwa kuwadai pesa za maombezi, si wanamkana YESU na neno lake na kumkimbilia huyo mwingine ambaye ni mpinga kristo anayelitumia jina la YESU. Mwenye akili na aelewe, mwenye masikio na asikie.

6.     Watu wanataka miujiza ya kipepo, hawataki ile ya YESU. Kwa mfano, miujiza ya kutolewa konokono au mawe na mengineyo, hiyo watu wengi wanaitaka wakati miujiza hii ni ya kichawi na ni ya kipepo. YESU aliomba roho chafu zikawatoka watu na pia YESU amesema twende kiroho na sio kimwili, sasa miujiza mingi ni ya kimwili ya yule mwingine. Lakini pia napenda uelewe kwamba MUNGU anampa mtu uhuru wa kuchagua, aidha kwenda mbingni au jehanamu. Wewe mwenyewe ndiye mwenye hatima ya maisha yako, isije ikakukuta  siku ile mbaya ya hukumu na majuto ya milele.  Isije ukajikuta wewe mwenye bahati mbaya aliyemtaka huyo mwingine uko mbele ya YESU akikwambia toka hapa sikujui sikujui na mwingine aliyemtaka YESU apite kwenye mlango wa uzima.

Wengine watasema nilikua nafunga na kuomba, nalala kanisani, nahubiri, nilitoa pepo kwa jina lako; YESU atakwambia sikukujua tokea siku hizo kama ilivyo sasa. Yakupasa wewe mwenyewe kujipima upo katika nafasi gani na kama haujui na sasa umefunguka ufahamu badilika maana ulidanganywa na huyo mwingine. Inawezekana huyo mwingine ameamuru uabudu sanamu, abudu wafu, batizwa ukiwa mtoto mdogo, andika jina katika sadaka na upewe risiti, hayo sio ya YESU. Utashangaa nyumba za ibada zinatumia jina la YESU lakini baadhi zinamtaka huyo mwingine. Huyo mwingine ni mafundisho ya uongo au mapokeo ya wanadamu. Shetani anatumia njia hii kuliteka kanisa ili aliangushe, kama alivyoliangusha katika baadhi ya sehemu huku wakipigwa upofu wajione wako sawa kumbe wapo vifungoni.

Huyu mwingine ni harambee au michango katika nyumba za ibada. Huyu mwingine ni kanisa kukopa benki ili kujenga kanisa. Ukisoma Neno, YESU anasema usijisumbue kwa lolote niulize mimi, sasa  mwataka kusema je ni YESU ndiye anayewaongoza wachungaji, mitume, walimu, manabii kwenda kumkopea YESU pesa za ujenzi wa kanisa? Jibu ni hapana na YESU sio masikini, vitu vyote vipo chini yake , pesa na dhahabu ni zake, sasa iweje aishiwe? Napenda muelewe huyo mwingine ndiye masikini. Anaongoza kwa kulitumia jina la YESU na ndio sababu YESU anasema huyo mtamkubali, na ni kweli huyo mwingine anakubaliwa sana na kumbe pasipo watu kujua au kwa kujua wamemkubali shetani. Huyu mwovu anayo mitego mingi sana inahitajika neema ya MUNGU kuyajua haya yaliyofichika. Na zaidi Biblia ambacho ni kitabu kitakatifu, Neno la MUNGU linasema usilipe riba. Sasa huyu MUNGU anabadilika? Hapa sasa uelewe dunia kwa kiasi kikubwa  ipo katika upande wa huyo mwingine ambaye sio YESU.

ANGALIZO:

Dunia hii katika kipindi hiki cha mwisho cha kuungojea ujio wa YESU, pamoja na kila mtu kulipwa ujira wake na YESU, haipendi  ukweli wa Neno kwa watu wengi, bali wanapenda kuchanganya uongo na Neno la MUNGU, hii haikubaliki na haifai, utakapokata roho utaenda kwa uliyempenda kwa sababu MUNGU yeye ni MUNGU wa haki na hata huyu mshtaki atakushtaki mbele za YESU siku ya hukumu. Badili nia yako na mkatae huyo mwingine utamjua  alivyo tofauti na neon, mwongozo usiotoka mbinguni. Wewe ni msafiri wa kwenda mbinguni, sasa haiwezekani upo kwenye njia ya jehanamu ukifikiri unaenda mbinguni, njia ya jehanamu haiendi mbinguni au kwa lugha nyingine njia ya huyo mwingine sio salama.

Sema, BWANA YESU naomba unisamehe dhambi zangu zote ikiwepo na hii ya kumtaka huyo mwingine, simtaki kuanzia ndani ya roho yangu na nje. Nakuhitaji wewe mwana wa MUNGU wa kweli uniandike katika kitabu chako cha uzima wa milele, nibadilishe, niponye fahamu, nifungue nikujue wewe YESU, naomba uniongoze pamoja na Roho Wako Mtakatifu, AMEN.

YESU akutunze.

Kwa mafundisho zaidi tembelea website yangu www.prophethebron.org na YouTube: Prophet Hebron.

NABII HEBRON WILSON KISAMO.