NINI MAANA YA KUZALIWA MARA YA PILI KWA MBEGU IHARIBIKAYO??

BWANA YESU WA NAZARETI ALIYE HAI ASIFIWE.  Ukisoma katika kitabu cha 1 Petro 1:23 inasema hivi kwa kuwa mmezaliwa mara ya pili si kwa mbegu iharibikayo bali kwa ile isiyoharibika kwa neno la MUNGU lenye uzima lidumulo hata milele.

Kwanza kabisa nataka uelewe kuwa kuzaliwa ninayoelezea mimi Nabii Hebron ni kuzaliwa kwa njia ya ubatizo, huko ndipo kuzaliwa mara ya pili. Kuzaliwa mara ya kwanza ni pale unapotoka katika tumbo la mama ukiwa kitoto kichanga, huko ndiko kuzaliwa mara ya kwanza. Inatokea kimwili kabisa, na kuzaliwa mara ya pili ni ukiwa mtu mzima unaelewa nini kinafanyika na unaokoka. Ukisoma mpaka ule mstari wa 25, inaelezea vizuri, hapo utaona Yakobo akielezea kuzaliwa mara ya pili kwa mbegu isiyoharibika, ambayo ndiyo mbegu ya MUNGU wa kweli yaani kama neno lilivyoagizwa katika Ufunuo wa Yohana 22:18-19.

Mbegu hii ya ubatizo wenye uhai na uzima ni ubatizo wa maji yanayotembea katika mto na siyo popote pale. Tazama YESU mwenyewe aliifuata mbegu isiyoharibika katika mto Yordani na Yohana mbatizaji na yeye alifundishwa na MUNGU na akafanya hivyo hivyo wala hakupunguza wala kuongeza sababu yeye alitokea mbinguni na ndiyo sababu imeandikwa ubatizo wa Yohana ulitokea mbinguni na hivyo alijulikana ni Nabii wa MUNGU wa kweli mpaka leo.

MBEGU HII YA KUMFANYA MTU AZALIWE MARA YA PILI KATIKA HALI YA KUHARIBIKA KIROHO NI IPI?

Mbegu hii ni batizo za aina zote  ambazo hazipo katika Biblia. Katika Biblia upo ubatizo mmoja tu ambao YESU na yeye alibatizwa katika mto Yordani. Soma Yohana 3: 11-17, na usipozaliwa mara ya pili kama YESU imeandikwa hauendi mbinguni, Yohana 3:5-7. Sasa shetani na malaika zake na mpinga kristo walianzisha batizo zao na kuzaliwa mara ya pili, kama mbegu iharibikayo ili utakapokubali kuzaliwa kwa jinsi hiyo mbaya basi unakuwa umejifungia wewe kwenda mbinguni sababu ya kiapo ulicho kipokea wewe cha mbegu mbaya iliyoharibika, neno “iliyoharibika” ina maana ni mbegu isiyofaa isiyo na uhai wa milele, ni mbegu yenye mauti ya milele.

Hata mimi nilishazaliwa katika mbegu iharibikayo ambayo ni ya ubatizo wa kikombe, ila namshukuru mwenyezi MUNGU alinijulisha nikajua nikabatizwa tena na kupokea mbegu idumuyo ya neno la MUNGU na ile ya kuharibika ikatolewa. Kabla ya hapo nilijiona nimezaliwa mara ya pili kama MUNGU anavyotaka kumbe nilizaliwa mara ya pili kwa njia ya mbegu iharibikayo na maisha yangu ya kiroho yaliharibika ila neema yake ilinigusa nikakubali kubatizwa katika kijito cha utakaso.

YESU akaniambia, Hebron hivi nikuulize swali, wewe umeshaona wapi mkulima mwenye akili timamu akapanda shamba lake mbegu zilizoharibika? Au wewe ukachanganyiwa mbegu nzuri na zilizoharibika, je utachukua zipi? Nikajibu nitachagua zile nzuri tu na nitaziacha zile mbovu. Akaniambia hivyo ndivyo ilivyo na katika kuzaliwa mara ya pili kizuri na kibaya mimi nitachukua mbegu za neno la MUNGU na siyo mbegu za asiyejulikana aliyezileta yaani hizo batizo ndizo mbegu zilizoharibika hazijatokea kwa BABA yangu mbinguni na ndivyo ilivyo katika ulimwengu wote wengi wamezaliwa mara ya pili kwa mbegu iharibikayo ili wasiurithi ufalme wa MUNGU. Ila ni wakati wako sasa uchukue hatua uwatumie na wengine injili hii ili kuzaliwa mara ya pili kama YESU na siyo tofauti na YESU. Shetani aliuchezea sana ukristo na wokovu kwa sehemu kubwa na akawateka wengi ikiwemo kuzaliwa kwa mbegu mbovu mara ya pili.

Nitaelezea baadhi ya mifano ya mbegu zilizoharibika za kuzaliwa mara ya pili. Kwanza ni ubatizo wa kikombe, ubatizo wa kisima, ubatizo kwa jina la mchungaji, ubatizo wa watoto wadogo (maji matone) na zaidi soma katika blog ya Nabii Hebron na usome kitabu cha “UBATIZO WA KWELI KWA ULIMWENGU WOTE” (kilichoandikwa na Nabii Hebron), utaelewa zaidi na majibu yako utayapata.

Huu ni wakati wa ujio wa YESU mara ya pili, wapo watumishi wa MUNGU wa kweli na wapo wa uongo, wachawi, freemason, watumishi wa mishahara na wa utapeli hivyo uwe makini sana. Unaweza ukaenda jehanamu kwa kupelekwa na mtumishi anayekupa mbegu iliyoharibika ukajikuta unazaliwa mara ya pili kiroho ukaingia mkataba wa mauti kabisa pasipokujua japo wapo katika dunia hii wametumwa na shetani kuleta batizo ambazo sio za MUNGU ni za miungu, unapozipokea na wewe unaangamia kiroho. Mbegu hii mbovu ikatae na ujiulize kama mtumishi anaongozwa na ROHO MTAKATIFU mbona hakuelezi batizo hizi hazijatokea mbinguni! Elewe unaongozwa na roho mchafu, kiroho na kimwili.

Ambaye unapenda kwenda mbinguni ubatizwe upya na ukatengwe nao ufuate njia nyingine ya kweli na MUNGU wako atakuwa ni kweli na siyo uongo.

NABII HEBRON.