MBEGU MBAYA

MBEGU NZURI HUZAA MBEGU NZURI NA MBEGU MBAYA HUZAA MBEGU MBAYA

 

BWANA YESU ASIFIWE! Basi ikiwa na maana kwamba siku zote mbegu mbaya haiwezi kuzaa tunda zuri, wala mbegu nzuri haiwezi ikazaa tunda baya, maneno haya aliyasema Yesu lakini ni kama fumbo.

 

Ukisoma Neno la Mungu kutoka katika kitabu cha Mathayo 13:36-43; Neno la Mungu linasema ³⁶Kisha Yesu akawaaga makutano, akaingia nyumbani, wanafunzi wake wakamwendea, wakasema, Tufafanulie mfano wa magugu ya kondeni. ³⁷Akawajibu, akasema, Azipandaye zile mbegu njema ni Mwana wa Adamu; ³⁸lile konde ni ulimwengu; zile mbegu njema ni wana wa Ufalme; na yale magugu ni wana wa yule mwovu; ³⁹yule adui aliyeyapanda ni Ibilisi; mavuno ni mwisho wa dunia; na wale wavunao ni malaika. ⁴⁰Basi, kama vile magugu yakusanywavyo na kuchomwa motoni; ndivyo itakavyokuwa katika mwisho wa dunia. ⁴¹Mwana wa Adamu atawatuma malaika zake, nao watakusanya kutoka katika ufalme wake machukizo yote, na hao watendao maasi, ⁴²na kuwatupa katika tanuru ya moto, ndiko kutakuwako kilio na kusaga meno. ⁴³Ndipo wenye haki watakapong’aa kama jua katika ufalme wa Baba yao. Mwenye masikio na asikie.

 

Bwana Yesu asifiwe, mfano huu Bwana Yesu alioutoa una maana kubwa sana, siyo kwamba Bwana Yesu ni mkulima wa shamba la mahindi au maharage, mbegu ambayo aliyokuwa anaongea hapa Bwana Yesu ni yake mwenyewe ambayo anaipanda yeye na hii mbegu ni yeye mwenyewe, lakini nataka ujue kuna mbegu mbili, katika hizi mbegu mbili na pia zina wakulima wake, Yesu ana mbegu nzuri, shetani ana mbegu mbaya, lakini mashamba ya kupanda hizi mbegu ni wapi? Ni kwa wanadamu. Achana na mfano ule tunaojua wa haya mashamba ya kawaida tunayoyalima, huu ni wa kiroho, ndiyo maana Yeye mwenyewe alitoka mbinguni akaja hapa duniani, Yeye akaonyesha njia, namna ya kupanda mbegu, sasa ukipanda mbegu nzuri utavuna mazuri, ukipanda mbegu mbaya utavuna mabaya, ni kama vile kwenye mashamba ya kawaida ukipanda mbegu mbovu haupati kitu na hata siku moja haiwezekani hapa duniani wewe uwe na shamba lako halafu mazao yameiva ukaenda kuvuna kwa mwingine, ndivyo itakavyokuwa ile siku ya mwisho, wewe ambaye Yesu amependa mbegu ndani yako ndiye atakaye kuvuna, kama ni shetani amepanda yeye ndiye atakuvuna, kwa hiyo nataka mnielewe, hizi mbegu zinavyopandwa, mbegu zinapandwa kupitia watumishi pale unapoongozwa sala ya toba, kama mtumishi amejiita au yeye ni mtafuta pesa au ni wa mazingaombwe basi unapokiri ile sala ya toba tu ndivyo ndani yako hiyo mbegu inapandwa. 

 

Bwana Yesu asifiwe, wewe ndiyo shamba, lakini tu ukikutana na yule mtumishi wa Mungu wa kweli; pale unapokiri ile sala ya toba, mbegu nzuri inaingia ndani yako, sasa inakuja shida na unaanza kujiuliza “nimeokoka mbona mambo yangu hayaendi?” je ni mbegu mbaya imepandwa au ni nzuri? Bila shaka ni mbaya, nadhani mnanielewa, na utakuta mwingine anaokoka, anakutana na mbegu nzuri anafanikiwa kwa haraka, sasa kosa haliko kwako unabaki na wewe kufundishwa kufa na shida zako, mimi nasema hakuna kufa na shida hapa, hata mimi Hebron mbegu mbaya nimeshaipitia, niliongozwa sala ya toba na huyu na yule, nakiri, aidha nikisikia kwenye redio au kwenye TV nakiri mpaka nalala chini ya TV naambiwa kiri hapa kumbe mimi nakiri sala ya toba ya mchawi, mbegu mbaya inaingia ndani.

 

Bwana Yesu asifiwe, hilo shamba ni wewe lakini hili shamba pia na shetani analitaka. Mungu ana wivu ili apande mbegu kwako akapate kuona utukufu wake kupitia maisha yako. Shetani naye hivyo hivyo anavizia na watatumia hata jina la Yesu, ni somo refu kidogo lakini nitakufundisha kwa ufupi ili ukapate kuelewa kwa sababu kuna mambo mengi ya kufundisha. Ukisoma mstari wa 43 unasema hivi, ”Ndipo wenye haki watakapong’aa kama jua katika ufalme wa Baba yao. Mwenye masikio na asikie”. Sasa unaweza ukasema mimi nakwenda mbinguni lakini mbegu ilyopandwa na baba yako wa kiroho kumbe yeye ni mwovu, na hizi mbegu zinapandwa na makuhani, ina maana kama mimi hapa Hebron mimi ni mtumishi, mimi ni kuhani, kama mimi ni mbegu mbaya na hao wengine wote nitakao waongoza sala ya toba wote watakuwa wamepotea, lakini kama kuhani yeye amesimama katika kweli ya Mungu, mkiongozwa sala ya toba mambo yote yanakuwa safi.

 

Bwana Yesu asifiwe, sasa kuna shida, kuna mbegu ya Mungu imeingia ndani lakini pia kuna mbegu ya shetani, siku zote mmea wa muhindi ukiwa na gugu, gugu lazima litakuwa linanyonya ule mmea wa muhindi usikue, sasa nataka hii mbegu ing’oke ili ibaki mbegu ya Mungu halisi (original) peke yake na hapa itakuwa ni mwisho wa kusikia mbona sibadiliki, mbona nafunga sana lakini niko kituo kimoja, mbona naomba sana nachoka naishiwa nguvu za rohoni. Hautendi dhambi, kumbe gugu linakunyonya hapo, ndio mambo ya kiroho yalivyo lakini ni somo zito sana. Mimi mwenyewe Hebron katika maisha yangu sikuwahi kufundishwa hili nilikuwa nikimsikiliza Mungu ninatetemeka, sikutaka hata mtu asogee karibu yangu nilijifungia, niliandika tu na kusikiliza, lakini nitakufundisha kwa kiwango kile ambacho kinatakiwa kwako mengine ni ya kwangu, maana mimi amenituma kupanda shamba lake na kung’oa mashamba ya shetani, ndio maana Biblia inasema  “kila pando asilolipanda Baba yangu wa mbinguni litang’olewa”. Unaweza ukamkuta mtu anahangaika, unamuombea na anampenda Mungu sana lakini kuna magugu, jua kwamba na magugu nayo huwa yanaomba na yanafunga.

 

Bwana Yesu asifiwe, ukisoma katika kitabu cha Mathayo 7:16-21, Neno la Mungu linasema ¹⁶Mtawatambua kwa matunda yao. Je! Watu huchuma zabibu katika miiba, au tini katika mibaruti? ¹⁷Vivyo hivyo kila mti mwema huzaa matunda mazuri; na mti mwovu huzaa matunda mabaya. ¹⁸Mti mwema hauwezi kuzaa matunda mabaya, wala mti mwovu kuzaa matunda mazuri. ¹⁹Kila mti usiozaa tunda zuri hukatwa ukatupwa motoni. ²⁰Ndiposa kwa matunda yao mtawatambua. ²¹Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaje mapenzi ya Baba yangu aliye mbinguni.

 

 

Nikuulize kitu, wewe una mbegu mbaya imepandwa ndani yako na shetani halafu unataka baraka za Mungu je! Inawezekana? Je, umeshawahi kuona mnazi unazaa maembe? Mwenye akili na aelewe, ndiyo wewe sasa kuna baraka za mbinguni zimeandaliwa kwa ajili yako lakini unakuta wewe ni mnazi sijui mnanielewa, kosa siyo la kwako ndivyo shetani anavyofanya kazi ya kuporomosha watoto wa Mungu, lakini mwisho wake umepita, sasa ni wakati wa kumpinduapindua, kama vile Mungu anavyonituma mimi na wale watumishi wa Mungu wanaosema kweli kupanda mbegu zake ili watu wabadilike, sasa watu watang’olewa huko ili wasonge mbele. Shetani amepanda hizi mbegu muda mrefu sana, haiwezekani mbegu ya Mungu iwe hivyo.

 

Bwana Yesu asifiwe, ukisoma Mathayo 7:19, Neno la Mungu linaseama “Kila mti usiozaa tunda zuri hukatwa ukatupwa motoni”, sasa mti huu unaozungumzwa hapa ni wewe au ni mwingine, kama umeshafunguliwa ukawa mti mzuri mshukuru Mungu maana unaweza ukajiona wewe uko sawasawa kabisa unaenda mbinguni lakini kumbe wewe ni mti mbaya umebatizwa kwa kisima, utakatwa. Nilikuwa nikijiuliza sana inakuwaje siku ile Yesu aseme sikujui, sikujui, hata wewe ukiambiwa Yesu anasema sikujui, sikujui siku ile ya mwisho wakati wewe umekuwa ukilala na kukesha kanisani, unasema umekoka, halafu anasema sikujui, sikujui! Sasa unaanza kuelewa? Haya umewekwa kwenye ubatizo wa kikombe, mwisho wake utakatwa! Eeh siyo mbegu yake, Yesu mwenyewe kabla ya kuja hapa duniani alitangulizwa Yohana, Yohana akaja akaweka mbegu ileile aliyopewa na Baba yake mbinguni, hakuipindisha, wala hakuigeuza, akasema muifuate vile ilivyo. Mimi mwenyewe Hebron ni mmoja wa mkristo aliyekuwa anaitwa kwa jina la dini ya mtu fulani badala ya kuitwa mwana wa Mungu, lakini yeye anamuitwa kama vile muhebron, na mimi nasema ndiyo dini yangu. Wanikome, mimi ni Yesu tu sitaki mbegu za majina ya watu, mfano mimi eti nakufa halafu useme mimi ni muhebron, mimi ni wa kanisa la muhebron, wapi wewe, sasa hiyo mbegu ni nzuri au ni mbaya? Bila shaka hiyo ni mbegu mbaya, basi ndivyo itakavyokuwa.

 

Ukisoma Mathayo 7:20-21, Neno la Mungu linasema  “²⁰Ndiposa kwa matunda yao mtawatambua. ²¹Si kila mtu aniambiaye, Bwana, Bwana, atakayeingia katika ufalme wa mbinguni; bali ni yeye afanyaje mapenzi ya Baba yangu aliye mbinguni.” Unaona Biblia inavyoelezea wazi? Sasa wengi ni mbegu mbaya, Bwana anasema hivi “siyo wote waniambiayo vile vile wataurithi ufalme wangu”, sawasawa? Sasa mimi sitaki mtu aje akatwe pembeni, mbegu mbaya, tunaichambua Biblia ikae kichwani ili uelewe, unaweza ukasoma mistari, lakini kama hamna mafunuo ni kazi bure.

 

Bwana Yesu asifiwe, ukisoma Mathayo 7:26-27, Neno la Mungu linasema  “²⁶Na kila asikiaye hayo maneno yangu asiyafanye, atafananishwa na mtu mpumbavu, aliyejenga nyumba yake juu ya mchanga, ²⁷mvua ikanyesha, mafuriko yakaja, pepo zikavuma, zikaipiga nyumba ile, ikaanguka; nalo anguko likawa kubwa”. Biblia iko wazi lakini jambo ninalotaka kulielezea kwa undani hapa ni “mbegu mbaya”, nani anataka kuwa mbegu mbaya? Bila shaka hakuna, lakini tulishakuwa mbegu mbaya, kwa kujua au kwa kutokujua.  Ukisoma Mathayo 15:13-14, Neno la Mungu linasema “¹³Akajibu, akasema kila pando asilolipanda Baba yangu wa mbinguni litang’olewa. ¹⁴Waacheni hao ni viongozi vipofu, Na kipofu akimwongoza kipofu mwenzake, watatumbukia shimoni wote wawili”.

 

Bwana Yesu asifiwe, Biblia inazidi kuelezea acheni viongozi wa vipofu, tunaongozwa, tunapandiwa mbegu na tunatii huku tukiambiwa ni habari ya Mungu. Bwana Yesu asifiwe, wengine tunaabudu sanamu na tunajiaminisha kwamba tunaabudu habari ya Yesu, kumbe ni mbegu nyingine, lakini nataka nikuambie, alisema watakuja watatumia jina lake na ndivyo ilivyo sasa maana shetani na yeye anatumia jina la Yesu kupanda mbegu zake. Mbegu hizi ni makanisa, unaweza ukaona makanisa mengi sana duniani, lakini kila moja lina mkulima wake, liko kanisa ambalo Yesu amepanda mbegu na liko kanisa ambalo shetani amepanda, sijui mnanielewa? Na unapokaa hapo na wewe unakwenda; kama ni kwa Mungu umekuwa mbegu ya Mungu na kama ni kwa shetani na wewe umekuwa mbegu ya shetani; hiyo imeruhusiwa. Ile siku ya mwisho watakuja Malaika wa Mungu kukuchukuwa, na hiyo siku ya mwisho nataka ujue watakuja malaika wa shetani kukuchukuwa vilevile maana aliye asi yuko na wafuasi wake. Siku hiyo Yesu ataangalia shamba lake, je ni wewe, “twende”. Wako watakaosema, Bwana Yesu mimi ni mkristo, Yesu atasema “hapana mbegu ya kikombe hiyo, ya miujiza ya kutoa mawe hiyo, mbegu ya kisima hiyo, mbegu ya harambee hiyo, siyo yangu”

 

Tunarudi kwenye somo, mbegu nzuri huzaa mbegu nzuri, mbegu mbaya huzaa mbegu mbaya, mimi hapa Hebron najijua, wewe nichunguze utajua je ni mbegu mbaya au nzuri, ndiyo maana hii mbegu iliyopandwa na Yesu ni ya Yesu mwenyewe, hujasikia hata siku moja nikimtoza mtu pesa, hujasikia hata siku moja mie natamka wale wa elfu, elfu wasimame hapa, hujasikia nabatiza kwa jina la mchungaji, hujasikia hata siku moja mimi nikiomba michango kwenye redio na TV. Mbegu nzuri ni sawasawa na Neno lake “nimekupa bure toa bure”, sasa wewe unaweza ukaona unamfanyia Bwana kumbe wewe uko kwenye mbegu ya shetani, umepoteza pesa, utafundishwa habari za kutoa fungu la kumi vizuri sana, sasa wewe unabaki kusema “mbona Mungu hajibu na mie nimepanda” hivi mkulima akipanda si huwa anavuna? Sasa mavuno yamekuwa ni ukame, baraka hakuna, ni mikosi tu.

 

Bwana Yesu asifiwe, siku zote nataka nikuambie kusema kweli ni vita, ukiwa unasema uongo unakuwa rafiki, mimi sitaki urafiki na mashetani; sitaki na wewe sema sitaki, utamalizwa. Kwenda mbinguni siyo kufungwa kamba miguuni jamani, ni Neno la MUNGU pekee, lakini sasa Neno linabadilishwa, kuna mbegu imechanganywa ukweli na uongo; unataja kuna Pasaka, lakini kuna sanamu, hiyo ni mbegu mbaya, kwa hiyo mbegu mbaya anayeipanda ni mbaya, ni shetani. Kwa hiyo shetani ataichukuwa mbegu yake, wewe unasema mimi nitakufa na dini ya mama yangu na baba yangu hiyo ni mbegu, utakwenda huko huko, toa watoto wako kwenye mbegu mbaya, ndiyo maana hii mbegu mbaya ukimkuta mtu anayo anajiita ni mkristo lakini haongelei habari ya wokovu, ukimweleza habari ya wokovu hakuelewi anakuzungusha au siyo jamani, kama nyie ni mbegu moja mtaelewana. Ndiyo maana mwingine atakwambia kama umeokoka wewe umechanganyikiwa lakini yeye anajiita mkristo na anabeba Biblia anasema Baba yetu uliye mbinguni, kumbe ni mbegu mbaya, sasa unaelewa?

 

Bwana Yesu asifiwe, nakutia moyo, inawezekana watu wamekukataa, wamekuchukia, haijalishi, wewe shukuru Mungu, wewe ni mbegu nzuri, mbegu mbaya haikukubali lakini hiyo mbegu itafika wakati itakwama, itakwama mpaka itanywea na itakuacha na watu wataanza kukukubali na wengine watatoka huko wawe mbegu nzuri ili tusonge mbele. Unaweza ukawa ni mchungaji, mwinjilisti lakini wewe ni mtumishi wa kupanda mbegu mbaya tu. Mimi nawaambia kama ni watu watakao hukumiwa zaidi, ni watu wanoitwa watumishi kwa sababu wao ndio wanaofanya watu wapone, waende mbinguni, lakini sasa wao ndio wanaofanya watu wapelekwe jehanamu, lakini wapo pia watumishi wamejaa mbegu mbaya wanaokwenda vituo mbalimbali vya maombi dunia nzima na anayeipanda ni baba yao shetani. Mwingine alikuwa ni mbegu ya Mungu, alianza na Mungu lakini akaondoka akamkataa Mungu na shetani akapanda mbegu mbaya juu yake; mtawajuaje, kwa matendo yao.

 

Jambo jingine si kwa kutumia uchawi bali ni shetani na nguvu zake anafanya kazi ndani ya kanisa, mtumishi kutenda kwake ni kama kwa shetani, ananena, anaimba kwaya na mengine, si alisema watatumia jina langu? Unafikiri bila kufanya hivyo watakupata wapi wewe, kwa njia hizo hizo wanapanda mbegu mbaya wakati wewe unataka amani, mbegu nzuri ni amani. Unatakiwa kukaa kwenye kiti kanisani kwa amani hakuna mambo ya michango, siyo ibada inakaribia kwisha mnaambiwa wamama bakini wale wa elfu-elfu n.k, hiyo haitakiwi, hiyo ni mbegu mbaya, peleka huko hatutaki mbegu mbaya. Unaweza ukaambiwa pokea baraka, lakini anayekwambia pokea baraka yeye ni mbegu mbaya, na unaposema amen, shetani anapiga muhuri katika ulimwengu wa roho, maana yake na iwe hivyo, hapo ujue umebarikiwa na mbegu mbaya. Nataka uvunje ule utabiri wa mbegu mbaya. Hii habari ya kuambiwa pokea, ukapokea mbegu mbaya, hiyo inazuia usipokee yale ya mbegu nzuri ya mwenyezi Mungu. Kaa na mimi nikufundishe, nikuelekeze, kazi hii ni ya kwake Mungu, hii sio kazi ya kwenda kusomea chuoni, kwani hakuna mtu anayeweza kusomea kazi ya kumpeleka mtu mbinguni. Mwalimu wa kazi ya Mungu ni Roho Mtakatifu mwenyewe.

 

Nataka uelewe, umewekewa mbegu mbaya, toka ulipozaliwa tu ukawahiwa badala ya kuwekewa mbegu nzuri ili ukastawi katika dunia ukawekewa mbegu mbaya, hata hawa watumishi wengine hawajui, wamesomea, sijui wana shahada (degree) za wapi, za ajabu ajabu na wenyewe wanaendeleza mbegu mbaya tu. Je mbegu mbaya inazaa mbegu nzuri, kama wewe mkristo ni mbegu mbaya, je unategemea baraka? Hapo tegemea mikosi, ndoa ina mbegu mbaya halafu wewe unataka mazuri, je mbegu mbaya imetoka? Maana kazi ya shetani ni kuharibu. Kuna mbegu mbaya ya mizimu, majini na mapepo. Nina ziamuru zote zitoke kwa Jina la Yesu.

 

Bwana Yesu asifiwe, nitaongelea mfano wa kanisa ambalo ni mbegu mbaya, ukiingia kwenye nyumba ya mbegu mbaya na wewe umetekwa. Aidha umetoa sadaka kwenye mbegu mbaya, mimi nakwambia utajiri hauji, mpaka wakuchomoe huko kwa maombi halafu mbegu nzuri ijae, maana sadaka zako Bwana ameziona, lakini sasa itashuka wapi? Kuna magugu, ambayo ni mbegu mbaya yamejaa hapo, ndio maana akasema yang’olewe mapando mabaya? Kwa hiyo, shetani anakubana mahali ukubali wewe mwenyewe usifanikiwe pasipo kujua au kupenda.

 

Bwana Yesu asifiwe, ziko mbegu za uchawi pia, mtu anapokwenda kwa mchawi katika ulimwengu wa roho anakupandia mbegu ili uumwe kichwa, anakupandia mbegu mwaka huu usifanikiwe na kweli unaona mwaka huo haufanikiwi, mimi nakwambia ukiwa na Yesu yeye ambaye ni mbegu nzuri hakuna mbegu ya uchawi itaingia ndani yako, maana mchawi kabla hajakuwekea mbegu mbaya anakuchungulia kichawi, wakikuchungulia vitu vyako vinaharibika, unaweza kukuta labda ni gari likishapandiwa mbegu ya kuharibika, kila siku gari litaharibika, vile vile wachawi wanaweza kukuwekea mbegu mbaya, kila ukishika pesa wewe unazitoa tu haufanyi kitu cha maana, hata shati hununui, aidha unaweza ukawekewa mbegu mbaya wewe mwanamume au mwanamke unakaa tu haufanyi kazi yaani kila kitu hauwezi na unakaa tu wakati Mungu amekuumba mbegu nzuri ikafanye kazi, ukafanikiwe ukawe kichwa. Sisi tumeambiwa ni uzao wa Ibrahimu ambao ni wana wa baraka wa Yakobo tuwe vichwa lakini inakuaje tumekuwa mbegu mbaya, mimi nakwambia utakuwa mkia tu na ndio maana utaona kwenye kanisa wengine wanaingiwa na wivu na kuanza kusema “mbona yeye anafanikiwa mimi sifanikiwi”. Sasa umeshajua siri, kama mbegu mbaya haijatoka mimi nakwambia utakufa na mvi hata bati haununui, halafu unasema kwa Baba yetu kuna kila kitu, angalia, kama kuna mbegu mbaya mimi nakwambia Mungu hashushi kitu chake juu yako maana si shamba lake, wewe utapalilia shamba la mtu uache kupalilia la kwako?

 

Bwana Yesu asifiwe, Mungu na shetani ni maadui, Mungu na shetani hawana maelewano kabisa mimi nakwambia, ni mbaya, mbaya; unaweza ukawekewa mbegu usizae. Hizi mbegu pia zina maagano yake, mbegu mbaya ina agano lake, agano la kwanza ni la ubatizo wa kikombe hizi batizo za ajabu, ajabu je umezitoa katika maisha yako? Utasikia mtu anasema mimi nakufa na ubatizo wangu mimi nakwambia utazikwa na utaenda kwa shetani, Yesu alivyokuja yeye agano lake alilolionyesha ni ubatizo wa maji mengi yanayotembea, hilo ndilo agano lake, sasa wewe unaambiwa ubatizwe unasema mimi sitaki au unakuta mtumishi anakuhubiria wakati yeye ana agano la mbegu mbaya; ubatizo wa kikombe, ubatizo wa kisima, ubatizo wa jina la mchungaji, sasa mwenye kuelewa na aelewe.

 

Bwana Yesu asifiwe, Yesu alikuwa anafundisha kwa mifano, na mimi nafundisha kwa mifano, wewe chunguza kwa faida yako, mtu asikutikise imani yako maana unaweza ukatikiswa imani yako na mbegu mbaya, utasema sisi watoto wa Baba mmoja, mimi sijui kama Yesu ana mbegu za makanisa ya mashoga, mimi sijawahi ona, lakini nalo litaitwa kanisa, mimi sijaona mbegu ya Yesu ya watu wanaabudu sanamu, mbegu ya Yesu, ukisoma Neno lake watu wanaombewa bure, mimi sijaona Yesu akiwaambia watu wewe leta pesa zako ili Mungu akuponye, mimi sijaona hiyo mbegu, mwenye akili na aelewe. Utaona unanenewa kumbe watu wanamwagiwa mapepo, maana shetani yuko kazini na Mungu yuko kazini, lakini Mungu mashamba yake ni machache, lakini mimi nakwambia utukufu wa kanisa la mwisho Mungu atavuna kuliko shetani na unaenda kunyanyuka zaidi na zaidi.

 

Bwana Yesu asifiwe, mimi nakwambia ingekuwa ni mbegu za Mungu kila mahali, kweli ingekuwa hakuna uchawi, watu wangelala kwa amani, hakuna wizi, hakuna watu kuvuta madawa ya kulevya; lakini sasa unakuta mchungaji (pastor) au askofu (bishop) na yeye ndio kwanza anaingiza kontena la madawa, sasa mnasema wanachafua kanisa, ndio wanachafua kanisa la kwao la mbegu mbaya na si kanisa la Mungu wa kwetu. Madawa ya kulevya ni kitu kibaya jamani, msije mkatumia, sijui eti bangi nibangue, acha hizo, haifai. Hiyo ni mbegu mbaya ya kuharibu akili na maisha yako, utadumaa, hiyo nitafundisha wakati mwingine. 

 

Bwana Yesu asifiwe, natakueleza moja ya maana ya mmea huu unaoitwa bangi (marijuana), asili ya mbegu ya mmea huu ilitoka kuzimu, kuzimu kuna mimea ilitupwa duniani, mmoja wapo ni mmea wa bangi, unaelewa? Unapovuta tu jini linaingia kwenye kichwa, kama umevuta jini la kusoma utasoma sana, kama jini la kuimba mziki utaimba sana, utacheza mpaka watasema anakipawa kumbe ni bangi nibangue, Haleluya! Nina amuru kwa Jina la Yesu mbegu mbaya toka katika maisha yako. Kwa nini wewe hujiulizi kuna mtu katika hali ya kwaida hawezi kuongea mpaka avute bangi, acheni hiyo kitu kabisa haifai, wengi mmepuliza, uongo? Acheni hiyo haifai.

 

Bwana Yesu asifiwe, mbegu mbaya kwenye ubongo ni majini, mapepo, hazifai, ziko mbegu za mateso, mimi nakwambia utaona mateso tu, ikitupwa kwa mtoto hamuelewani, wewe unamwambia hivi na yeye anafanya vingine matokeo yake unamtandika, acha kumtandika, mlete kwa Mwenyezi Mungu hiyo roho itolewe atabadilika tu. Amenituma kutengeneza, mimi neema ya Mungu ilishanipitia, mbegu mbaya ikatoka, ikaondoka, nikiomba inakuwa, nikitamka inakuwa, wakishindana wanashindwa, mbegu nzuri na itazunguka dunia nzima.

 

Bwana Yesu asifiwe, mbegu mbaya unapewa kiroho, ziko za kichawi, ziko za kimila, ziko za kiganga, ziko za kidunia; sizitaki nataka ya Bwana Yesu wa kweli, ziko za mpinga Kristo, hizi zina maagano yake ndio maana zinakuwa na masharti unasikia kama ulikuwa hutoi sadaka hawakuziki, hayo ni maagano yao. Kuna watu wana mbegu mbaya mpaka wamezikwa makanisani, jamani duniani kuna vituko sana, kanisani kabisa patachimbwa na mtu anavalishwa na sanda analala akijua anampenda Mungu halafu anakaa pale wanamzunguka halafu anatoka kumbe ndiyo amefanywa kafara. Sasa kama kuna mbegu mbaya pia ujue kuna shamba baya, mbegu mbaya inapelekwa kwenye shamba baya na mbegu nzuri inapelekwa kwenye shamba zuri yaani kuna kitu kizuri cha Mungu kinaenda kwa watu wa Mungu na kitu cha shetani anapeleka kwa watu wake lakini siri anakuwa nayo kuhani. Mafundisho ya uongo ni mbegu mbaya unapoyaamini na kuyashughulikia kama vile kubusu mbao au sanamu na mambo mengine ya ajabu, hutaki kuokoka unaambiwa wewe ni mkristo utaenda mbinguni ukiokoka kata shauri, zote hizo ni mbegu mbaya, sema sitaki kwa jina la Yesu. Hiyo mbegu mbaya kuna mtu anaye inyeshea ili ikue na inaombewa na katika ufalme mwingine, inatolewa sadaka na wanafunga. Wanafundishwa madhabahuni na wanazidi kukomaa namna wanavyotaka na ukishakomaa unatii yale ya kwao.

 

Bwana Yesu asifiwe, na ile mbegu ya Mungu na yeye Mungu anainyeshea, anakufundisha, anakuombea, anakuinua na wewe unashangaa unaanza kutii ya Mungu, mimi Mungu alivyoniita alinipanda yeye ananinyeshea, ananikuza naendelea kunyanyuka na wewe hivyo hivyo nataka uwe kama mimi, mbegu mbaya iwe mwisho. Mbegu mbaya ina utii wake, utaona kuhani anakuangalia mara tu unaanza kutetemeka na unatoa kila kitu unamuachia, utasikia akisema “bwana” anasema nyie wagumu sana lakini “baba” wasamehe usiwauwe, na kwa sababu kuna mbegu mbaya ndani yako inatii ina muunganiko (connection). Mimi nakwambia huyo ni mwongo, kwa sababu Mungu wetu hauwi watu ni Mungu anayeokoa. Wewe umeshasikia wapi kuna hela ya kununua cheti cha kwenda Mbinguni? Mimi nilikuta kwenye baadhi ya makanisa kuna mambo hayo sijui laki laki na kuna watu wamenunua, mimi nakwambia cheti chako cha kwenda Mbinguni ni sala ya toba na utakatifu pekee. Damu ya Yesu ilimaliza pale msalabani, hiyo ni mbegu nzuri, sasa wewe unatoa hela ya cheti cha kwenda Mbinguni, ndio unapelekwa huko kuzimu. Utajiri wako unaharibika, baraka zinaharibika, unapowekewa mikono na mtu mwenye mbegu mbaya ujue umechukua matatizo na siyo baraka.

 

Bwana Yesu asifiwe, ziko mbegu mbaya za chanjo, kujichanjachanja mwili, hizo ni mbegu mbaya, kwa nini Biblia ikasema mapando yote yang’olewe? Mungu anajua hayo yapo, sasa badala ya kuwa kichwa unakuwa mkia kwa sababu ya mbegu mbaya. Mbegu za kuwa mikia mimi sizitaki. Halafu mtoe imani ya kila kitu ni kurogwa, mengine ni shetani mwenyewe, jiulize ni mara ngapi umesema amen katika mbegu mbaya? Maana yake unasema na iwe hivyo, Haleluya!

 

Sema Bwana Yesu, naomba unisamehe, dhambi zangu zote nilizozifanya, hata pale ambapo niliongozwa sala ya toba nikapokea sala ya toba na mbegu mbaya ikaingia ndani yangu, kwa idadi zake, naomba Bwana kupitia Damu ya mwanao YESU KRISTO WA NAZARETI, hiyo mbegu itoke, nichunguze Bwana, wewe wanijua, mimi sitaki kukataliwa ile siku ya mwisho, maana umesema kwamba sio wote wasemao BWANA BWANA watakao urithi ufalme wako, Baba yamkini ni mimi, wewe wanijua sijihesabii haki, mbegu mbaya itoke, iniachilie kabisa, itoke kwenye baraka zangu, itoke kwenye imani yangu, itoke kwenye fahamu zangu, itoke kwenye damu yangu, tena itoke na mizizi yake isibakie katika Jina la Yesu, mizizi ya mbegu mbaya itoke, toka kabisa mbegu mbaya, ondoka, potea, katika Jina la Yesu. Baba ninakushukuru, pokea sifa na utukufu, najua ya kwamba ule mwisho Malaika wako wa Mbinguni Watakatifu watakapokuja kuvuna shamba lako na mimi watanivuna, sitavunwa na mwovu, sitavunwa tena na shetani, naomba Baba ukarejeshe maana shetani alinivuna, alinitumikisha, alinitesa mpaka nikaona dunia hii haifai, nikaona maisha hayafai, imebaki ni vilio, nimebaki na kuteseka, ni kwa Neema yako Mungu ninakushukuru Baba, katika Jina la Yesu, Amen.

 

NABII HEBRON.