KONDOO WA YESU WA KWELI HUZIKIMBIA SAUTI ZA WAGENI!

BWANA YESU ASIFIWE!

Tutasoma katika kitabu cha injili ya Yohana 10:2-6, Neno la MUNGU linasema “²Aingiaye mlangoni ni mchungaji wa kondoo. ³ Bawabu humfungulia huyo, na kondoo humsikia sauti yake; naye huwaita kondoo wake kwa majina yao, na kuwapeleka nje. ⁴ Naye huwatoapo nje kondoo wake wote, huwatangulia; na wale kondoo humfuata, kwa maana waijua sauti yake. ⁵ Mgeni hawatamfuata kabisa, bali, watamkimbia; kwa maana hawazijui sauti za wageni. ⁶Mithali hiyo YESU aliwaambia, lakini wao hawakuelewa na mambo hayo aliyowaambia.”

BWANA YESU ASIFIWE. Neno hili lina maana kubwa sana, unaweza ukawa mchungaji au mwinjilisti au nabii au muumini ambaye yuko chini ya sauti za wageni.

Sauti za wageni ninazozungumzia hapa ni kuhusu habari ya ufalme wa MUNGU, kwa nini tunaambiwa kwamba sauti za wageni kondoo hawazisikii? Wewe ni mwenyeji wa mbinguni lakini hapa duniani ni mgeni, sasa wewe mkristo umekuja hapa duniani unataka kusikiliza sauti za wageni, pale inakufanya wewe kuwa chini ya mchungaji au mwinjilisti wa wageni hutaki kusikiliza sauti za wenyeji, lakini wale ambao wanasikiliza sauti ya MUNGU aliye hai wao hawataki kusikia kabisa sauti za wageni maana wanajua si za kwetu, sijui mnanielewa? Mithali hii YESU aliwaambia lakini hawakuelewa, amenituma nikwambie habari za ufalme wake, haleluya! Wewe ulitoka mbinguni unatakiwa urudi mbinguni, kwa hiyo wewe si mgeni ni mwenyeji wa mbinguni, lakini kitakachokufanya ubaki hapa duniani ni pale tu utakapokubali kusikia sauti za wageni.

Unapokubali kupokea ubatizo wa kikombe umepokea sauti za wageni, unataka kuombewa unaambiwa leta pesa umepokea sauti za wageni, unapoabudu sanamu umesikia sauti za wageni lakini wale wa MUNGU hawataki kusikia sauti za wageni, wao na mchungaji wao wanataka kusikia sauti ya wenyeji wa mbinguni peke yake. Sasa wewe unayetaka kwenda mbinguni uhakikishe kwamba husikilizi mafundisho ya waongo, hizo ni sauti za wageni zinafanya maisha yako yawe ya kigeni, baraka zako ziwe za kigeni, wakati MUNGU amesema utafanikiwa katika dunia hii, lakini wewe umechagua kuabudu sanamu hauwezi kufanikiwa katika Neno la MUNGU, utatoa sadaka sana, mafungu ya kumi lakini wewe umebatizwa kwa ubatizo wa kikombe, wewe unasikia sauti za wageni.

Sauti ya wageni haiko mbinguni kwa hiyo usitegemee cha Mwenyezi MUNGU, rudi kwake. Utaomba mpaka utapasuka mdomo lakini hamna kitu, mimi nazikataa sauti za wageni. Mimi nashangaa sana, nawaeleza watu habari za ufalme wa MUNGU, utashangaa watu wengine wanasema “tunaomba tunampinga Hebron” hamnipingi mimi bali mnampinga MUNGU. Mimi nataka usikie sauti ya mbinguni na wale ambao wanasikia sauti ya mbinguni wataongozwa na mchungaji wa mbinguni, kwa hiyo sasa ni kukataa watumishi wa sauti za uongo, kataa. Biblia inasema hivi wala hawakubali sauti za kigeni, wewe unataka kubatizwa unaambiwa utoe ada, kataa hiyo sauti kwa jina la YESU.

Unapokubali kwamba mimi si mwenyeji wa mbinguni, maisha yako yanaharibika, njia zako zinaharibika lakini wewe huna kosa bali ni mafundisho uliyopokea toka madhabahu za mafundisho kigeni.

BWANA YESU ASIFIWE, wewe unakuja kubarikiwa unaambiwa leta pesa ndio ubarikiwe, leta kiwango fulani au kiasi fulani MUNGU ndio anataka. Soma Biblia, sauti ya wenyeji inasema “nimekupa bure toa bure”, sasa wengi wanapenda sauti za kuambiwa wale wa elfu elfu, laki laki, amka, hapa sizitaki sauti za wageni na wewe sema sizitaki, zipotee katika maisha yangu katika jina la YESU.

Zile sauti zikikufuata na zikikaa ndani yako zitakuhubiria na kushika maisha yako, vitu vingine si uchawi ni sauti za wageni. BWANA YESU asifiwe, sijui mnanielewa, utaenda kwenye ibada ya maombezi, mikutano hiyo ndiyo sauti za wageni, utasikia wakisema “tumemaliza mkutano chukua bahasha ya sadaka ya kesho, hizo ni sauti za wageni, MUNGU hakutuma watumishi wake ambao amewatoa mbinguni kuja kutafuta pesa hapa.

Nitawaambia ukweli anayekataa akatae na akasirike ninakwambia sauti ya mbinguni, ndio maana watu wanahangaika, ndio maana watu wanateketea wakin’gan’gania njia ya YESU kumbe ni njia ya yesu wa wageni, tabia za wageni hatuzitaki tunataka tabia ambazo ziko kwenye biblia na Neno la MUNGU kama lilivyo! Haleluya!

YESU alisema watakuja nyakati zile za mwisho watachanganya Biblia na uongo, watakusomea Biblia lakini ana ubatizo wa kikombe, huyo siyo mwenyeji wa mbinguni nina uhakika ninachokwambia, umenielewa? Uko nabii wa ugeni, mtume (apostle) wa ugeni, mwinjilisti wa ugeni, mchungaji wa ugeni, mwalimu wa ugeni, askofu wa ugeni, shemasi wa ugeni, utamjuaje, anayoyafanya hayako kwa Mwenyezi MUNGU, kwa hiyo yeye ni mgeni hayo ya ugeni umeyatoa wapi, ni kwa mungu asiyejulikana, sasa na wewe unavyoongozwa hata kama unaabudu hapo umekwenda! MUNGU hakujui, siku ile utasema “BWANA mimi nimeokoka” umeokoka katika miungu ya wageni, unakubali kusikia sauti ya wageni unabatizwa kwenye kisima YESU alibatizwa wapi? “mtoni” lakini sauti ya wageni inabatiza katika “kisima” sasa kuna watu wanataka baraka za MUNGU halafu hawataki kuja kwa sauti ya wenyeji wa mbinguni, tii, amua, haijalishi watakucheka, haijalishi watakukataa wewe geuka twende tusonge mbele, kataa sauti za wageni.

BWANA YESU asifiwe, ukitoa sadaka zako kwa sauti ya wageni usitegemee baraka, ukiimba tu toeni sadaka ya kwaya, hiyo ni sauti ya wageni. Sasa unashangaa watu wanasubiri sadaka ya kwaya, sadaka ya pambio, sadaka ya somo la utangulizi, sadaka ya shuhuda, wanarudi wanakaa baadae sadaka ya mke wa mchungaji, baadae ya kodi ya mchungaji. Je hapo hamjawa masikini? Je hapo hujarudi nyumbani kwa miguu? Kumtolea MUNGU ni nzuri lakini unaweza ukamtolea MUNGU katika sauti za wageni ndio maana huoni kitu.

BWANA YESU asifiwe, na wewe unaweza ukawa umefanya vitu vingi lakini huoni MUNGU, haya umetoa matofali kwa wageni unategemea ujenzi uendelee hapo? Lakini MUNGU anasema wale walio wangu wanaisikia sauti yangu na mchungaji wao hawaitaki sauti ya wageni, kwa hiyo nakutia moyo mtu anayekukataa angalia anafuata sauti ya nani? sauti ya wageni wanakukataa sababu wao wanataka kuwa wa michango, wanataka kukanyagiwa sadaka na bahasha zao wanataka kuombewa kwa viwango vyao walete pesa zao, hizo siyo sauti za mbinguni, hizo ni sauti za miungu (wageni) maana MUNGU wako ni anayejulikana, aliyekuumba si mungu mgeni, sasa na wewe imani yako imekuwa ya wageni, sauti ya wageni ikishaingia kwenye moyo wako hautaki ukweli na ukisoma biblia inasema  kweli ila huitaki.

Fungua masikio yako, sema sauti za wageni sizitaki tena, toka kwenye nyumba yangu na maisha yangu, mwambie mimi naijua sauti ya mchungaji wangu namjua na MUNGU, mimi siijui miungu. Utasema umeokoka, unafunga lakini kumbe uko kwa wageni, unaimba kwaya ya wageni. BWANA YESU asifiwe, YESU atasema sikujui sikujui, YESU anarudi, ile siku ya mwisho watu watalia na kusaga meno, YESU atasema wewe ulikuwa kwa kikombe sikujui sikujui, hiyo siyo sauti yangu nenda mtoni ukabatizwe, mimi ni mkristo lakini sijaokoka atakuambia sikujui sikujui hiyo siyo sauti ya MUNGU, sasa watu wengi wako kwenye sauti za wageni na wanaona wako sawa kabisa, nitapiga kelele sauti ya MUNGU iingie ndani yao ibadilishe watu.

Sauti za wageni zimekaa mpaka kwenye mifuko ya watu, hapana! Hapana! Baraka zako zina sauti za wageni, unaambiwa andika jina, namba za simu katika sadaka, hizo ni sauti za wageni. MUNGU mwenyeji anasema sadaka ni siri yako, sasa wewe unakuja kumlilia MUNGU mbona hunibariki, waambie wageni waachie mali zako. Sema, mapepo na mafundisho ya uongo siyataki.

Mimi Hebron nilipozaliwa tu nikawekewa sauti ya mgeni mwanamke huku mwanamume huku wananisimamia ubatizo wa kikombe, je! YESU alisimamiwa na mtu, sasa hapo wewe haujawa mgeni? Unaonekana si mwenyeji wa mbinguni, wachawi watakushughulikia wanavyotaka, pesa yenyewe itakuwa ni mgeni wakati wewe unatakiwa kuwa mwenyeji mwenye baraka, sasa baraka zinaondoka wakati tumeambiwa, tutatawala, tutashikilia, sasa ziko wapi? Unabaki na roho ya kilokole, tutakuwa kichwa mbona tumekua mikia? Kama Baba yako yeye ni kichwa na wewe utakuwa kichwa twende tusonge mbele, sikiliza sauti ya mchungaji wako ambayo ni ya MUNGU lakini sauti za miungu (wageni) sizitaki, sijui kikapu cha mama mchungaji, hizo ni sauti za wageni zikatae, ukija kanisani wewe uwe mwenyeji wa kwenda mbinguni.

MUNGU atakufungua na ukitaka kumbariki unambariki wewe mwenyewe kwa kupenda siyo kutengenezewa tengenezewa mazingira ya kutoa mali na madeni, acha kulipa madeni, kama mchungaji amekopa yeye amefuata sauti ya wageni, MUNGU amesema hivi, mchungaji wangu aniulize mimi asiumize kichwa, sasa kuna injili za sauti za wageni. BWANA YESU asifiwe, mtaambiwa pokea, utapokea za wageni, pokea maisha mazuri maisha ya wageni nuksi balaa na mikosi lakini kwa sauti ya mdomoni umeambiwa pokea mazuri, yeye anachangisha pesa ndani yake kumejaa nini? Simama imara, unapopokea tofauti na Mwenyezi MUNGU tayari na wewe unakuwa wa wageni. Mpaka sasa hivi hutaki kuokoka wewe si mwenyeji wa mbinguni ni mgeni kwa hiyo unataka tu kubakibaki hapa duniani eti unasema nina dini ya mama yangu watanielewaje? wakatae wageni na wewe uamue ndani yako mwenyewe, sema nakataa, kwa sababu mimi nikikwambia kataa kama wewe mwenyewe unasema nawapenda ni kazi bure. Tumeharibiwa dunia nzima, asilimia kubwa tunafanywa kuwa wenyeji wa dunia hii siyo wenyeji wa mbinguni.

Amenituma niwaeleze habari njema, mimi Hebron situmwi na wanadamu na hata wao ambao wanawapeleka watu kuwaletea sauti za wageni, OLE wao watakutana na Mwenyezi MUNGU, MUNGU anawapenda watoto wake, ndio maana hamfanikiwi mnateseka wakati YESU ameleta watumishi wake wa kweli na wale wa kweli nao wanakanyagwa, hawasikii, sasa hivi watumishi wa kigeni ndio wamejaa, mafundisho ya kigeni, mapokeo ya kigeni yamejaa, sasa wewe umeshamjua BWANA YESU ni wakati wa kuyakataa mafundisho ya kigeni ama sivyo watakurudisha nyuma uwe mgeni wa jehanamu, mwambie mimi sitaki, mimi ni mwenyeji wa mbinguni.

Watoto wako unapeleka kwa wageni, wanaenda kubatiza watoto wadogo, mtoe huko kwa maombi, wewe umesikia sauti ya MUNGU Neno la kweli limekutoa huko, piga sauti ya wageni, mimi nakueleza unaweza ukazunguka Arusha nzima au Tanzania ukakuta makanisa ya kweli labda ni arobaini (40) tu, tena haya makanisa makubwa makubwa baadhi yao ndiyo hayafai kabisa, mimi ninawaambia ukweli, ninauhakika na ninachokisema, ninajua wanachokifanya lakini mwisho wao siyo mrefu na kazi hiyo imeanza anaifanya YESU peke yake ili kweli inyanyuke, maana Mwenyezi MUNGU anataka watoto wake, dini imekuwa ni biashara na michango, hayo ni mambo ya wageni, hata kama atakuja askofu na mashuka yake na kusema tunatoa mchango hapa, hayo ni ya wageni, halafu unategemea baraka zako zije hapo, haziji, ndio maana unachanganyikwa, rejea uokoke twende mbele, kataa mafundisho ya uongo haijalishi watakukataa, haijalishi watakuchukia, sema sawa tu mimi ninakwenda mbinguni.

Unajua kile kilichomjaa mtu ndicho kimtokacho, atakurudisha nyuma usiende mbele atakuambia nifuate mimi usisikilize sauti ya kweli mwambie wewe ni mgeni sitaki sauti ya wageni, haya utasema nataka nibarikiwe, mgeni unategemea baraka za MUNGU? Njooni bwana kwa mfalme upate mambo yako.

Inawezekana mume naye tayari kuna sauti ya wageni au mke au watoto, vitu haviendi, sasa ni kuvunja hizo sauti za wageni na uzichome moto katika ulimwengu wa roho, MUNGU amesema nimekupa bure toa bure sasa mchungaji bila aibu tena anachangisha watu pesa, huyo ni mlafi, nasema ni mwizi tena ni jangili kabisa. Ukisoma moja ya amri ya MUNGU inasema “usiibe” sasa yeye mwenyewe mchungaji ni mwizi anachukua pesa za watu pesa ndiyo awaombee wakati MUNGU anasema nimekupa bure toa bure, wewe hauoni huyo ni mwizi mnabaki kusema tunapiga roho ya wizi wakati mchungaji (pastor) mwenyewe ni mwizi. Nakuambia kweli ukichukia chukia mimi nasema kweli, wengi watafunguka na watamjua MUNGU, wewe unaye n’gan’gania utabaki na baba yako mwizi na madhabahu ya wizi na mapepo yatakuja kuiba kila kitu chako, sikiliza sauti ya MUNGU na mchungaji wako anayekuongoza lakini ukiona mambo ya michango michango ujue hapo hamna sauti ya MUNGU, tayari na nyie mmeshaharibikiwa, wewe utajiona umesimama sawa lakini kumbe umeharibikiwa, haleluya!

BWANA YESU asifiwe, utaenda kwenye maombi na hata redio unalala nayo ukisikiliza usiku kucha au TV kumbe unasikiliza sauti ya wageni, wageni wa kipepo wanaingia kwako, mafundisho ya uongo, maroho ya shetani yanaingia ndani yako, kataa, ndio maana hata baraka kwako hazikai. Mungu ametuandalia Baraka uzao wa Ibrahimu, ziko wapi, kuna wageni haijalishi watasema nimeokoka, wanatumia biblia, Yesu alisema watatumia jina langu lakini Mimi sijawatuma. Nimetumwa niwaambie habari njema, kwa Mungu wewe ni mtoto wa mfalme, sasa wewe nenda kwa wageni na useme mimi mtoto wa mfalme kumbe ni mtoto wa mgeni. Mimi Hebron nataka uwe mwenyeji wa mbinguni, nataka uyashikilie maneno haya, nataka yakusaidie utaona unanyanyuka, utaona unasonga mbele, siyo kwenye sanamu kidogo, kwenye kadhalika kidogo, utashangaa umepotea. Sema hata madhabahu za kigeni siendi, kwa maana unapoingia tu pale, anayoyazungumza mchungaji na wewe tayari umeshaisikia sauti ya wageni tayari umetekwa, hata useme sadaka yangu siandiki jina haijalishi roho ni ile ile, uchumi wako wenyewe utakuwa ni wakigeni, baraka zako hazikukubali, sasa ukija kwenye sauti ya Mungu inasema “mtakanyaga, mtamiliki, mtashika” iko wapi? Makosa siyo ya kwako na wala hautendi dhambi, ni sauti za kigeni.

Haleluya! Ukiwa mwenyeji wa mbinguni hakuna pepo litakusogelea wala mchawi, lakini kwenye sauti za wageni wachawi ndiyo watakutesa, sikiliza sauti ya wenyeji, mimi Hebron mchungaji wangu ni Yesu siwezi shindwa, na wewe twende pamoja hauwezi shindwa, haleluya! Sikiliza sauti ya mchungaji wako ambayo ni sauti ya mbinguni utanyanyuka, sasa wewe kama ukitaka kusikiliza sauti ya mchungaji wako mambo ya elfuelfu, michango, ubatizo wa ajabuajabu, nakuambia wewe ni wa hapa hapa, fanya uamuzi wako sasa na ubadilike, umrejee Yesu.

Unaweza ukawa wa yesu wa kigeni lakini haupendi, kwa nini watu wanachukia ukweli? Mimi Hebron kabla sijaanza kuhubiri habari za Yesu wa kweli kila mtu alinipenda lakini nilipoanza kusema ukweli hata wachungaji walinichukia na kuanza kuniambia sina adabu, mimi nina mheshimu Mungu, sitaki pesa za watu, mimi siyo mwizi lazima sauti ya Mungu niisikie ”nimekupa bure toa bure”, hao wanaochukua pesa za watu wameshakuwa wachawi, unaweza kusema unaenda kumuona mchungaji kumbe unaenda kumuona mganga na anakupigia simu akisema “Bwana ananiambia usipotuma pesa haraka utaangamia” na wewe ukisikia hivyo unaogopa na kuanza kutafuta pesa popote na hata kukopa ili upeleke sadaka mimi nakuambia hiyo siyo sadaka ni pesa ya mkopo anayodaiwa mahali anataka akalipe, usikubali kufanywa chuma ulete, akafagie hata barabara ili apate pesa na siyo kuwanyan’ganya watoto wa Mungu pesa zao, nakuambia ukweli, mimi Hebron sina ushirika na wapuuzi na watu wa namna hiyo maana Biblia inasema niwapumbavu na wewe kataa, Yesu alikataa sauti za wageni leo ni mwenyeji wa mbinguni. 

Utasikia baadhi ya watumishi wakisema Bwana Yesu asifiwe ukafikiri ni sauti za mbinguni hizi Bwana Yesu asifiwe hizi hata shetani ni aina ya bwana hata wewe na bwana wako ni bwana kuna bwana shamba, kuna bwana afya wote hao ni mabwana lakini huyu Yesu ni Bwana tofauti, kataa sauti za kigeni, huyo yesu anayeangalia mifuko yako, nakwambia huyo siyo Yesu wa mbinguni, nakwambia ukweli, hili ni kanisa la wenyeji wa mbinguni na mimi Hebron ni mchungaji nimeletwa kutoka mbinguni sasa sikiliza twende kwa wenyeji wa mbinguni.

Yesu aliwaambia mithali hii hawakuelewa sasa wewe uelewe, usipoteze muda wako kwa wageni wa hapa duniani. Bwana Yesu asifiwe, unayetaka kupona upone, mbinguni wanakwenda wenyeji, wewe usitake kwenda na ugeni wa shetani kule mbinguni, nembo ya ubatizo wa kikombe, ubatizo wa kisima wanakuambia maji tele, wapi? Kama ni kubatiza kwenye visima angebatiza Yohana maana jagwani kuna visima vingi lakini alienda mtoni kama alivyoonyeshwa na wenyeji wa mbinguni maana mbinguni upo ubatizo wa mtoni, huwezi kubarikiwa ukiwa ni wa wageni, nataka uwe mwenyeji, na unapokuwa mwenyeji wa mbinguni usifikiri wale ambao hawataki mambo ya mbinguni watakupenda, hawatakupenda kwa sababu ndani yao iko roho ya hapahapa ya kuwapeleka kuzimu, imeruhusiwa kwa mwanadamu anayetaka kuwa mwenyeji wa mbinguni sawa anayetaka kuwa mgeni sawa, ndiyo maana Biblia inasema katika mstari wa tano Yohana 10:5, inasema hivi “mgeni hawatamfuata kabisa bali watamkimbia kwa maana hawazijui sauti za wageni.”

Hata mimi Hebron mgeni simtaki kabisa, hayo ni mapepo, mafundisho ya uongo siyataki kabisa, nimewakimbia maana namjua mchungaji wangu ni Yesu wa mbinguni asiyebatiza kwa kikombe, asiyeombea watu kwa pesa, ambaye hana ubaguzi, ambaye hana sadaka ya mama mchungaji, ambaye nyumba yake yeye haina mambo ya kigeni, sijui harambee, mara amekuja Raisi, sijui Katibu, sijui askofu hayo ni mambo ya sauti za wageni mtakuwa na makanisa ya kigeni, kataa, nataka kanisa la wenyeji wa mbinguni pale ndipo Yesu alipo, Biblia inasema “pale unapoabudu ndipo na maisha yako yalipo”. Kuna watu wanabudu mahali penye madhabahu za kigeni maisha yao yanabaki kwa wageni, yatoke katika Jina la Yesu, haijalishi watakushauri kwamba umepotea, waambie mimi ni mwenyeji nyie ni wageni, mimi Hebron nilichukiwa, nilikataliwa lakini nimewasamehe wote walionikataa maana wao wamekuwa ni wageni hawataki habari za mbinguni, achana na sauti za wageni zikatae twende mbele, Mwenyezi MUNGU awabariki sana.

APOSTLE HEBRON.    ­